Mlevi amtumbulisha jipu Sifui

            Hakuna wakati aliowahi kunikuna rais Joni Kanywaji Mugful kama alipoamua kumtolea uvivu jamaa yangu Muombeni Sifui. You know what? Mimi ndiye niliyemchoma tena kwa kuandika wazi wazi makala ndefu ya kumwambia Dk Kanywaji kuwa jamaa naye ni jibu aliyeshiriki kwenye utawala jipu uliozaa na kulea majipu yanayomsumbua.

            Japo nataka hii uifanye siri wewe unayosema, ukweli ni kwamba wazo la kumtumbua jibu Sifui niliotoa mimi kwa bwana mkubwa ambaye huwa ananisoma na kunisikiliza sana. Namshukuru bwana rahis kwa hili. Pia namshauri azidi kunisikiliza na kufuata ushauri wangu mojawapo ukiwa ni kumtaka asimpe ulaji–kiherehere mmoja aitwaye Po Makondakta–anayejipendekeza hata kwa kutaka kudhalilisha wapiga chaki eti wasafiri bure na kuinuliwa kila mara kwenye siti atakapokuja abiria anayelipa.  Nani anataka vya dezo? Kwanini msiwapandishie mishahara na kuwaongezea marupurupu badala ya kutaka kuwadhalilisha kwa kutaka kujipendekeza kwa Dk Kanywaji?  Sasa huyu jamaa namtumia salamu rasmi–kama Sifui–lazima naye atumbuliwe jipu.        Hata hiki kitegemezi cha mgosi Makambale kikae mkao wa kutumbuliwa jipu kwa kubwabwaja bila kufikiri kikidhani kinajijenga kumbe ndiyo kinajibomoa.

            Tukirejea kwa Sifui, mimi nilishamstukia hasa nikizingatia alivyoshirikiana na Njaa Jaa Kaya kugeuza kaya yetu shamba la bibi kama alivyosema Dk Kanywaji hivi karibuni. Huwezi ukamlaumu Njaa Kaya na uchafu uliotamalaki ikulu ukamsaza Sifui. Nani hajui kuwa mwenzake Shabby Gurumo alirambishwa uchache na jambazi la Escrew Jimmy Rugemalayer?

            Tatizo la Sifui ni kutoona mbali. Siku alivyofurushwa kidhabu mwingine aitwaye Salva Rweyependekeza ingewafungua macho akina Sifui na wengine ambao bado wako Ikulu wakingoja kutumbuliwa majipu. Ngoja nikuibie siri kidogo. Juzi nilimtonya Dk Kanywaji kwa siri–siyo kupitia hapa wala kwingine–kuwa aanze kuwatumbua majipu wakuu wa mikoa na wilaya wote walioteuliwa kishikaji bila kusahau majaji na mabalozi na wenyeviti wa bodi za ulaji zilizotapakaa kayani. Pia, nilimshauri afute baadhi ya wilaya na mikoa vilivyoanzishwa kishikaji. Maana, ni mzigo kwa kaya.

            Baba ya yote, pia napanga kumwandalia waraka wa kutaka awatumbue wote waliogeuza kaya yetu shamba la bibi kuanzia siku alipong’atuka mzee Mchonga hadi alikoanzia. Hapa jamaa zangu wastaafu waliokuwa wakihomola wakati waligeuza kaya shamba la bibi wakae mkao wa kutumbuliwa majipu. Hamjawaona wanavyopigana vikumbo kwenda ikulu kujidhalilisha kwa kijana mmoja anayewazidi maarifa na ujasiri kugusa pale walipotomsa? Ama kweli alijisemea mfalme Suleimani kuwa heri kijana maskini mwenye busara na akili kuliko mfalme mzee na mpumbavu. Je hawa wafalme wanaopigana vikumbo kwenda kuomba majipu yao yasitumbuliwe siyo wapumbavu kweli? Sijui kama jamaa zangu wa Liliondo, Kiwira, NBC, EPA, Kagoda, Escrew, UDA, SUKITA, Rada, Dege mafua la rais, Meremeta, Mwananchi Gold na wengine wengi watachomoka.

            Hata akina kalu na absiii waliozea kufanya uchumi wa kaya yetu shamba la bibi na kunenepeshea kunguru toka India wakae mkao wa kutumbuliwa majipu hasa kutokana na kuziba mianya yao yote ya kutugeuza hamnazo kutokana na kutawaliwa na hamnazo kana kwamba nasi ni hamnazo. Nina mpango wa kumwambia apitishe sera kuwa wafanyabiashara wote wasiruhusiwe kupanga kwenye nyumba za Asajile Mwaijumba wakati mihekalu yao wakipangisha watasha na wengine kugeuza maghala ya kuhifadhia wahamiaji haramu wanaokimbia ukapa, ukata na ukwete huko kwao kwenye kaya ya kalu na absiii.

             Kabla ya kusahau, unafahamu kuwa nilimshauri Dk Kanywaji kutomruhusu bi mkubwa wake kuanzisha NGO ya ulaji kama vile MAWA na Fursa Sawa kwa wake za wakubwa? Nani anataka ujambazi wa kutumia NGO ya kuficha mgongoni mwa rahis kuwaibia walevi? Who wants it? Who needs it? Nani huyo aseme nimsikie nimsakizie atumbuliwe jipu? Tena kabla ya kusahau kutokana na mibangi na mi-hangovers, sijasahau. Lazima nimshauri Dk Kanywaji atumbue hata NGO za wake wa wakubwa bila kuwaangalia nyani usoni. Hapa ni kutumbuana majipu hata kama mtumbuliwa amesimama.

            Nikirejea kwa Sifui, sisi tulijua kuwa hana udhu wa kukaa patakatifu pa patakatifu palipokuwa pamegeuzwa pango la wezi tangu zama zile aliposema nabii Musa (Mungu amweke mahali pema peponi). Kwa miaka 30 patakatifu pa patakatifu paligeuzwa pango la kila kinyama cha usiku kiasi cha kunuka na kuchusha.  Nimesikia eti atapangiwa kazi nyingine. Kazi nyingine au kesi nyingine?

            Sasa ngoja nifunge kazi. Naomba hii usome kimya kimya wala usimwonyeshe wala kumwambia mtu. Nina mpango wa kumtembelea Dk Kanywaji kwenda kumpongeza, kumtakia mwaka mpya na kumpa ujumbe mzito ambao utatikisa kaya yetu. Guess what. Nataka nimpe jibu baba na mama ya majipu liitwalo Chama Cha Majipu (CCM). Kwa vile ananiaminia, nitamwambia kuwa bila kutumbua CCM kazi yote anayofanya ni bure. Hapa mzee wa pembe za ndovu atakuwa anajinonihino kwenye nonihino yake akingojea kutumbuliwa jipu.

Anyways, tionane next week.

Chanzo: Nipashe, Machi 12, 2016.