Katika kudurusu na kusukuti juu ya unene unavyonajisiwa na kudhalilishwa na baadhi ya wanene uchwara, nimegundua kitu cha maana sana. Nimefyatuka na kugundua kuwa kuna matapeli wawe wa dini au siasa wanaojifyatua na kutaka kunifyatua ili wanitumie kuwafyatua mafyatu wangu waligoma kufyatuka hadi wanafyatuliwa na kila kinyangarika na zwazwa. Ukiwa mkazi wa muda wa ikuluni, unapaswa kuzingatia haya nitafyatuayo. Kwanza, ujue, watakujia wapiga dili wasaka ngawira na tenda wa kila namna. Watajifyatua na kujichekesha kuwa wanakuzimikia wakati wanawakia ulaji wako.
Nasema wote waelewe. Nimefyatuka kifyatufyatu tayari kwa kufyatua yeyote atakayekunifyatua. Ikuluni kwangu sitaki wadudu wawe chawa, funza, kuguni, viroboto, na wote wanyonyao damu na jasho la wengine. Hawanifyatui hata wajigeuze na kuonekana ni mafyatu orijino. Sitaki uhalifu na wahalifu ikuluni mwangu. Sitaki wauza bwimbwi, majambazi , na matajiri uchwara wajifyatuao wakidhani watanifyatua kifala na kizwazwa. Mie ni bonge la msomi mwenye PhD zisizohesabika tena za kusomea siyo za kupewa, kuzawadiwa wala kununua.
Mie si zwazwa. Ni mtakatifu anayechukia watakakitu wajitiayo utakatifu ilhali ni wahalifu wa kawaida wajifyatuao wawafyatue wanene kama mimi. Hivyo, fyatu au mdudu yeyote ajifyatuaye akidhani atanifyatua, ajue. Atafyatuliwa kiroho mbaya. Sitaki mchezo wala machezo na unene wangu nilioamini na mafyatu wenye unene wao. Baada ya kuufyatua unene si wanananiijia matapeli wataka kitu na vijizawadi uchwara kupata photo-ops nani wanitumie na kuzitumia kuwafyatua mafyatu wangu. Wanadhani sijui janja na njama zao uchwara siyo? Kuanzia leo, sina mchezo na yeyote ajifyatuaye na kutaka kuchezea na kunajisi unene wangu. Lazima tufike mahali tubadilike kabla ya kubadilishwa. Tufyatuke na kufyatua maovu na waovu kabla ya kufyatuliwa hasa pale mafyatu watakapofyatuka na kutoka kwenye usingizi wao wa muda mrefu.
Kinyamkera yeyote akeraye na kuchukiza atakayekunipa zawadi, sharti aeleze alivyofyatua njuluku na utajiri wake. Siwezi kugeuza ikuluni yangu takatifu kuwa chaka na pango la majambazi, matapeli, wahalifu, na wasaka ngawira nikawa salama. Hivyo, yeyote anayejifyatua na kuota mchana kuwa atakuja na kufanikiwa kunifyatua, ajue. Nitamfyatua.
Kuanzia leo, ni mwiko picha zangu hata ziwe za zamani kutumiwa na fyatu yeyote. Mnataka kupiga picha nami. Kwani, mie pambo au ua? Najua malengo yenu machafu. Mkishafyatua picha nami, mnakwenda kuwatishia mafyatu na kuwafyatua. Pia, mnajionyesha wajanja nami fala wakati mie si fala. Mnakwenda kuwafyatua mafyatu kuwa mu wasafi na watakatifu ilhali ni wachafu kama nguruwe na watakakitu wenye uchu kuliko fisi hayawaani laanifu. Mlaaniwe na mlaanike. Amina amina amina.
Pia, nifyatuke na kuonya. Kuanzia leo, hakuna kuchanganya biashara iwe halali au haramu na siasa katika Fyatuland. Haiwezekani kila anayeamka na kujifyatua anajifanya kuwa karibu na wanene ili kuficha uchafu wake. Mie siyo maji wala sabuni ya kusafishia maovu na uchafu wenu. Wala mie siyo dodoki au kapeti mfutie uchafu wenu na kuniacha mchafu na kuchafua usafi na utakatifu wangu niliopewa na Sir God mwenyewe hadi akatengeneza zari nikaishia kuufyatua unene ambao sasa wengine wanajifyatua na kutaka kuutumia kuwafyatua wengine nikiwamo mimi. Wanadhani mie ni zwazwa wanitumie? Hakuna dhambi mbaya kama kujirahisisha hadi unafyatuliwa badala ya kufyatuka na kufyatua mafyatu matapeli na wahalifu wajifyatuao kutaka au kufanikiwa kukufyatua.
Juzi, nilimkumbuka na kummiss fyatu Nchonga aliyesema kuwa ikuluni ni sehemu takatifu na hakuna biashara yoyote isipokuwa kuwatumikia na si kuwafyatua mafyatu. Ukiwa ikuluni, hupaswi kuitumia kutumika kuwafyatua wengine. Ikitokea hivyo, uje wewe ni ajali ya ikuluni na ni hovyo, mchafu, zwazwa, na hauna maana kabisa. Ikuluni si kama madhabahu ya matapeli na shetani ambapo kila mhalifu hutumia kuwafyatulia mafyatu wasiofyatuka na kutumia bongo. Ikuluni ni kama hospitali. Ni sehemu ya wenye matatizo yaliyoshindikana na si pahali pa ubinafsi, utapeli, usanii, na ukumbaff mwingine kama huo. Ikuluni kwapaswa kuwa na kuni za kuwafyatuliwa na kuwaunguzia matapeli na wahalifu wa kila aina.
Ukiwa mpangaji wa muda ikuluni wapaswa kufyatuka na kujikinai na kukinai kila kitu. Kuna ushawishi na vishawishi usiaambiwe. Kila ajae huja akitabasamu. Wengine hukuramba miguu hata manonihino ilmradi wa kufyatue. Watakuimbia mapambio, mashairi, ngonjera, na nyimbo. Wajifanyao wanakupenda ilhali wanakuponda, wakishakufyatua, hukudharau na kukuzomea kwa vile umefyatuliwa na kujiruhusu kutumika kama kifaa. Kwanini ugeuzwe diaper kana kwamba huna kichwa wala akili? Kwanini ugeuzwe kijiko cha kuchotea ulaji au kiatu cha kuvukia ukapuku? Thubutu. Wafyatue wengine ila siyo mie. Najua hii itamfikia mgoshi Machungi bingwa wa kujifyatua ili anifyatue asiweze. Nasema sasa. Kama mbwai wacha iwe mbwai hata mbwa.
Chanzo: Mwananchi J'tano leo.
