Fyatu afyatuliwa na kutubia kwa kuwafyatua mafyatu

 

Niseme wazi. Leo, sifyatui yeyote bali kufyatuka na kujifyatua baada ya kugundua kuwa kila fyatu, hata yule anayewafyatua wenzake, kuna siku atafyatuliwa. Ni suala la muda tu au kujisaulisha kama siyo ulimbukeni, upofu, hata uzwazwa kama siyo kujifyatua ufahamu wakati kila kitu kiko wazi. Kama daktari wa falsafa mwenye magudulia na maguni ya PhD, juzi nilikuwa nasome kitabu kiitwacha the Nature of Nature kilichoandikwa na professa emeritus Nkwazi Mhango Nkuzi. Niligundua kuwa kumbe kila kitu kina marejeo tena kwa usawa. Hata ufyatue vipi, ipo siku isojina utafyatuliwa uonje ladha ya adha za wale uwafyatuao. Hivyo basi, kuanzia leo, sina hamu wala haja tena ya kuslowlow au kunchimvi fyatu yoyote hata aniudhi kiasi gani. Nifanye hivyo kwanini wakati najua yapo marejeo?
        Katika kusoma kitabu hiki, Professa anaeleza kuwa ufyatuzi uko wa aina mbili, yaani ule wa uhai na vitu vya umma wa mafyatu kama vile mali na njuluku. Mfano, ukiua, utauawa au kufiwa. Ukiiiba utaibiwa. Ukidhulumu kadhalika. Ukifurahia mateso ya fyatu mwenzio, kuna siku wengine watafurahia na kushangilia yako. Wenye nguvu leo hawakuwa nazo jana na kesho zitawatoka kama zilivyokuja. Mashujaa watakufa sawa na woga. Wagonjwa na wazima wote hufa. Kila kitu hufa isipokuwa dunia. Kwa ufupi, ni kwamba ukifyatua wenzio jua.
         Hakika, utafyatuliwa saa nyingine vibaya kuliko hao uliowafyatua. Yawezekana wale watakaokufyatua siyo wale uliowafyatua. Wapo wanaofyatuliwa na wale waliowafyatua au ndugu zao. Wengine hufyatuliwa na Mungu ili kutoa somo kwa wengine wanaopanga kuwafyatua wenzao wasijue nao watafyatuliwa. Kisichoepukika ni kwamba utafyatuliwa tu kwa njia moja au nyingine ili inapofika zamu yako ya kufyatuliwauonje adha na uchungu wa kufyatuwa wengine.
            Baada ya kugundua ukweli huu kwenye the Nature of Nature, nimeacha kujifyatua, kuwafyatua wengine, na kujifanya au kujisahaulisha kuwa siwezi kufyatuliwa wakati nafyatuliwa kama niliowafyatua. Juzi, nilipata msiba mkubwa wa swahaba yangu mkubwa aitwaye Nonihino rafiki yake rafiki yangu Mgoshi Machungi kule Mashindei. Huwa sina tabia ya kulia au kuogopa kufyatuliwa wengine tena wasio na hatia au wema kuliko mimi.
                Katika kudurusu somo la kufyatua na kufyatuliwa, nililia sana baada ya kufyatuliwa rafiki yangu mchivichimvi aliyefyatuliwa polepole hadi kutoweka ghafla bila kuacha hata chembe ya alama. Baada ya hili kutokea, nililia hadi kuishiwa nguvu mpaka Mgoshi Machungi akafyatuka na kugwaya asijue siku moja atafyatuliwa kama ambavyo amekuwa akijifyatua na kuwafyatua wabaya wake. Japo Mgoshi alinionea huruma, nilimsikitikia kwa vile zamu yangu ilikuwa imefika na kupita. Ni wangapi huliona hili kama  nilivyoliona? Kwa kufyatuliwa swahiba wangu, nilionja joto ya jiwe. Hivyo, nimeamua kufanya kitubio kwa Sir God na wale niliwafyatua iwe kwa njuluku hata uhai.
            Kwa vile kufyatuliwa ni lazima, hata uwe mfyatuzi namna gani, siku moja usioyijua utafyatuliwa sawa na wale uliowafyatua. Utalia, kuchukia, kuogopa, na kuomboleza kama walivyofanya wale uliowafyatua au ndugu zao. Tuache kufyatuana. Duniani tunapita tu. Wabaya wangu walifurahi swahiba yangu alipofyatuliwa kwenda kwa aliyemfyatua. Wengine walisherehekea na kujiridhisha kuwa haki ambayo sikuitenda ilikuwa imefanyika. Hata kama nashukiwa kuwa na roho mbaya, kwanini mafyatu wanafyatuka na kuwa na roho mbaya hivi hadi kusherehekea msiba wangu.
            Wakati roho ikiniuma na kuzongwa na machungu na majonzi, nikiwa nimefyatuliwa na mshangao na woga, nilimuuliza Mgoshi Machungi kwanini mafyatu wamefyatuka hivi hasa pale walipofyatuka wakagoma kunisamehe na badala yake wananishitikia kwa Sir God anifyatue kama alivyonifyatua. Kusikia hivyo, Mgoshi alifyatuka na kunifyatulia ukweli kuwa maisha ni kula na kulipa na huu ulikuwa ndo wakati wangu wa kulipa kwa kufyatuliwa.  Alisema kuwa ukimfyatua au kuwafyatua wengine, nawe una siku yako ya kulipa kwa kufyatuliwa iwe wewe au yule umpendaye kama ilivyotokea kwa swahiba wangu mkubwa na wa pekee. 

            Kwa vile sasa nimelijua hili, nimeamua kutubu. Katika kufanya hivyo, nawaomba wote niliwafyatua kwa roho mbaya na uzwazwa wangu wanisamehe. Wafikie mahali waseme imetosha kama nisemavyo kuwa, kuanzia leo, sitajifyatua, kufyatuliwa na kuwafyatua wengine au kupenda na kushabikia ufyatuzi kama njia ya kumaliza matatizo na tofauti zetu. Najua wengi wanaonea wivu ulaji na unene vyangu. 
        Kuanzia sasa, najua ni vya muda. Najua fika kuwa ukiishi kwa upanga, utakufa kwa upanga. Ukiishi kwa kuwafyatua wengine, nawe utafyatuliwa. Mwenzenu nimefyatuliwa hadi nikaanza kuchukia na kuogopa ufyatuzi hasa utokanao na roho mbaya, ukatili, uroho, na uzwazwa. Mie ni nani hadi nijifyatue na kujifanya hayanihushu wakati yalishanisibu nilipofyatuliwa kwa kufyatuliwa swahiba wangu kipenzi Nonihino?
            Kufyatua ni kutamu ila kufyatuliwa usikie. Naamini kule Mashindei akina Mgoshi Machungi na Jitu wameipata.
Chanzo: Mwananchi J'tano leo.

Epuka na ogopa ndoa ya madoadoa

Baadhi ya vitabu vya dini husema kuwa ndoa ni takatifu vikiashiria na kumaanisha usafi na upekee wa ndoa. Utakatifu huanzia pale wawili wanapoamua kufunga ndoa. Hapa, wahusika huachana na familia zao na kuunga na kuwa kitu kimoja katika ndoa. Hivi, kuna jambo gumu kama kuacha wazazi, ndugu, na jamaa kwenda kuishi na mtu ambaye wala hakumzaliwa wala kukua pamoja? Zingatia sana. Hivyo, ndoa ina upekee wa hali ya juuu na haipaswi kuwa na madoadoa au uchafu.
            Kama wanadoa hawafichani miili yao, kwanini wafichane mioyo yao hata kama si rahisi kuona kilichomo moyoni mwa mtu? Uzoefu unaonyesha kuwa wanadoa wenye mambo au siri ambazo hawataki wenzao wazijue wanaishi kwa mateso. Siri hazitesi tu bali zinaua ndoa. Ukitaka kutokuwa na ndoa yenye madoa, epuka kuwa na siri au jambo binafsi baina yenu.
        Leo tutaanza na swali dogo tu. Je, nani huleta madoa kwenye ndoa? Hili, ndilo somo letu la leo kwa wanandoa na watarajiwa. Katika makala hii, tutagusia baadhi ya ndoa za madoadoa na viashiria vyake ambazo ni muhimu kuziepuka na kuziogopa ili kuepuka kuishia hasara na majuto.
        Tuanze. Unakuta ndoa ina wanandoa ambao kila mmoja anavutia upande wake hata kujifanyia mambo yake bila kujali kuwa ndoa ni muungano wa watu wawili kwa usawa. Mfano, baba au mama anajenga nyumbani kwao bila kumhusisha mwenzake. Hili doa katika ndoa. Mwingine anasomesha ndugu zake kwa siri ilhai mwingine akiwa na mpenzi wake wa kando aka nyumba ndogo. Hili nalo ni doa.
        Ili ndoa iwe na siha na kushamiri lazima isiwe na madoa. Madoa yaweza kuwa makubwa hata madogo. Wenye ndoa za madoa wajue. Wao ndiyo wanaoyatengeneza na mwisho wa siku wao ndiyo waathirika wa madoa haya katika ndoa. Siku hizi, kuna simu za rukono au za mkononi. Unakuta wanandoa wanafichana nywila za simu zao. Ukiona au kufanya hivi, jua unaweka doa kwenye ndoa yako.
        Wapo wanandoa wanaofichana vipato vyao iwe ni mishahara au fedha zitokanazo na vikoba. Haya nayo ni madoa. Wengine wanapendelea ndugu zao ilhali wakiwachukia ndugu wa wenzao. Nalo, hili ni doa katika ndoa.
        Je, nini kifanyike kuepuka kuweka madoa kwenye ndoa yenu? Japo swali hili ni dogo, laweza kuwa gumu na lenye majibu mengi. Hata hivyo, kuna kanuni ya kufuata. Nayo inasema ‘mtendee mwenzio kama ambayo ungetaka akutendee.’ Kwa mfano, ili ndoa iwe takatifu na safi, lazima isiwe na madoa tajwa hapo juu ambayo yote hulindwa na siri na usiri visivyo na msingi. Hapa, ni kufahamu fika kuwa hakuna siri ya milele. 

Unaweza kujidaganya kuwa utatunza siri yako na haitafichuka. Amini. Ipo siku itafichuka tena wakati na namna ambavyo hukutarajia. Ukifanikuwa kutunza au kuficha siri ni kwa muda tu. Itafichuka tu. Hivyo, kuwa na siri ni kujidanganya na kujihatarishia ndoa yako licha ya kuiweka madoa.
        Kama mnaweza kuvuliana nguo, kwanini iwe vigumu kuvuliana na mioyo? Hakuna jambo linadumisha na kushamirisha ndoa kama wawili kuepuka kuwa na siri bila kujali ukubwa wala udogo wake. Kuwa na siri ni kama ugonjwa wa kansa. Inaitafuna ndoa na wanandoa taratibu hadi mjikute mkiua ndoa.
        Kama kuwa na siri ni lazima, basi siri husika iwahusishe wawili waliomo katika ndoa. Hapa, tunamaansha ulazima na umuhimu wa wanandoa kuwa na kutunza siri za mafanikio ya ndoa yao. Mnakosana kidogo, habari mtaani. Mke au mume anaachishwa kazi na kipato kupungua, unaanza kulalamika hadi hata ndege wanasikia. Leo, mna hali mbaya kimapato kiasi cha kula vibaya. Mmoja au wote mnaanza kupaza sauti na kulalamika kwa majirani na marafiki. Kama mnafanya hivyo jua mtaivunja au kuiyumbisha ndoa yenu. Hapa, ndipo siri za wanandoa huwa muhimu. Na siri kama hizi, licha ya kuwa jambo bora na jema, hazihatarishi, kuyumbisha, wala kuvunja ndoa. Zilizobaki ziepuke. Zitakuvunjia ndoa na siyo hizo siri bali wewe mwenye siri hizo. Zingatieni haya.

Chanzo: Mwananchi J'pili ilyopita.