Kijiwe kukamata mali za mafisadi

            Baada ya taarifa za kufumka kashfa ya ufisadi wa kutisha ambapo mhalifu fulani wa Tume ya Kupamba na Kueneza Rushua, sorry Kupambana na Kuzuia Rushua (TAKUKURU) kukutikana akimiliki mimali yenye utata ya mabilioni, Kijiwe kinataka kuisaidia sirikali kuanza kuwafichua wote wenye utajiri wa kutia shaka tena ambao wanajulikana hata kwa kunguru.

            Mpemba ndiye analianzisha leo. Baada ya kuamkua anakula mic “yakhe mmesikia hii skandali ya mkubwa wa kuzuwia rushua kukutwa na ukwasi mkubwa utokanao na kadhia aloajiriwa kupambana nayo akaishia kuishirika na kuipamba?”

            Kapende anajibu “nimeyasikia haya japo sijashangaa. Hakuna jipya hapo. Hao mbona wengi na wamefanya kaya yetu iwe maskini kwa kupewa cha juu na kuacha ihujumiwe na magabachori na sasa wachukuaji waitwao wawekezaji ukiachia mbali wazungu wa unga? Mbona wanajulikana na kila mtu hata ndege na wadudu? Hapa nadhani suala si kuongelea kutokea kwa hili bali namna ya kupambana nalo; au vipi?”

            Mgoshi Machungi anachomekea “nakubaiana nawe. Hapa lazima tianzishe utaatibu wa kia mwanakaya kutangaza, kukaguliwa na kueeza namna aivyochuma ukwasi wake ii tisiendee kuibiana kama iivyo sasa ambapo mbuua wachache wanaendee kugeuza kaya yetu shamba la chizi. Tena katika kutangaza ukwasi wetu tiepuke mambo ya kibashitebashite kama iivyo sasa ambapo kaisai ameonyesha wazi kumbeba habithi huyu hata aiposhutumiwa kuwa na mimai kibai yenye kutia shaka.”

            Mijjinga anakula mic “hata nami nakubaliana na wazo la kuamua kuwatolea uvivu wezi wetu ambao wengi wao wanatukoga utadhani wamechuma kwa stahiki au ujanja wao. Hapa, kama kijiwe, tuanze kuzitambua mali husika, ziko wapi, ni kiasi gani, zinamilkiwa na nani, halafu tuzivujishe kwenye vyombo vya habari. Nashangaa hata vyombo vyetu vya habari vimeshikilia siasa badala ya kufanya uchunguzi wa majambazi kama hawa ili watiwe adabu na kurejesha njuluku zetu.”

            Kapende anakula mic “Mijjinga hapa umemena bro. lazima tufanye utambuzi kwanza ili tuanze ukamataji au uvujishaji wa mali husika. Ni rahisi kuwatambua wezi wetu waliotumia ofisi zetu kujineemesha. Mfano, unakuta kijana kamaliza shule mwaka juzi tu lakini ghafla bin vu anatokea kuwa tajiri wa kutisha. Hapa lazima tuanze kuhoji wote kuanzia zama za mzee Ruksa ili kuwatendea wachovu haki. Haiwezekani tukaendelea kuhubiriwa na watawala kuwa wana nia ya kupambana na ufisadi wakati wakiwafumbia macho mafisadi na wezi kama hawa wanaotumia ofisi za umma kujineemesha na kuhujumu kaya. Mie nawajua mia kidogo; na niko tayari kuwataja ili washughulikiwe vilivyo.”

            Msomi Mkatatamaa anatia guu “ni kweli; mali za wizi na waliojilimbikiza wanajulikana. Hata ndege wanajua zilipo na ni kiasi gani na ni za nani na anafanya kazi ofisi gani. Nadhani kinachowasaidia wezi hawa kuendelea kutuibia na kufaidi mali zetu ni ile hali ya jamii yetu kugeuka ya kuabudia vitu badala ya haki na utu. Wengi wa wezi hawa ni wenzetu, wanetu, ndugu zetu na marafiki zetu. Hata hivyo, kama sirikali ikiendelea kuwadekeza tutakwenda kuzimakamata kama noma na iwe noma; au vipi?”

            Kanji naye hajivungi. Anakwanyua mic “mimi iko sikia vatu nalalamika naonewa sana na Kufuli. Kama nasikia vanalalamika tadhani vameonewa. Sasa kama naibia kaya nategemea ipewe sada ya ua au iweke pango naonja joto ya jiwe kama jusi. Kama nasema Kapenda, unakuta toto dogo bila juzi vovote naanza kazi leo. Keso nakubwa bilionea. Naangusa jengo kuba kuba, natongoza bibi kubakuba, nakula kwa hoteli kubakuba, naendesha gari kubakuba, nahonga toto na malaya gari kubakuba ya bei baya. Hii kama siyo chori napata vapi hii feza nachezea kama jugu?”

            Mheshimiwa Bwege anaamua kula mic “mimi nina mawazo tofauti nanyi. Kwanini tusitunge sheria ya kuwakamata wahusika na kuwanyonga na kurejesha mali zetu ili wezi wengine waogope kama wanavyofanya China. Ukikamatwa umekula njuluku ya kaya China wanakunyongelea mbali bila kujali cheo, chama, dini wala ukaribu wako na wanene kama ilivyo hapa ambapo mmeongelea kashfa ya Bashite ambaye anatuhumiwa kukwanyua njuluku kibao lakini dingi anafanya gozi gozi kumtumbua. Nakubaliana na wanaosema tuwasake hawa wezi. Tukiwakamata tuwafanyie kama vibaka ili kuepuka kupelekwa lupango wakahonga na kurejea Uswazini kumalizia mali zetu huku wakitukoga hata kuwahonga wake zetu.”

            Da Sofia Lion aka Kanungaembe anakula mic “tatizo si kuhonga wake zenu. Tatizo ni  kutuibia na kutenda vitendo vya kishenzi. Hata wangechuma kihalali, hawapaswi kuwahonga wake zetu wala binti zenu. Mbona mnawadhalilisha wanawake; kwani hakuna wanaume wanaoohongwa na hawa hawa wenye nazo yaani mashuga ladies siyo?”

            Mipawa aliyerejea toka Morogoro kumzika mkewe anaamua kula mic “kusema ukweli hali hii ya wachache kuiba mali za umma kwa kutumia ofisi za umma inasikitisha sana. Juzi nilipopata msiba wa mke wangu kipenzi, nilijua maana ya kutokuwa na kitu. Kusafirisha maiti ilikuwa ngoma usipime. Sasa inakuwa uchungu zaidi pale unapoteseka kwa ukapa na ukata wakati kuna majambazi wachache wakiibia kaya yako. Naunga mkono pendekezo la kuwachoma moto mibaka hawa wakubwa. Kwanini tuwe na uwezo wa kuwachoma vibaka tushindwe mibaka tunayoijua na kuishi nayo?”

            Kijiwe kikiwa kinanoga si likapita shangingi la kijana mmoja anayefanya kazi Uwanja wa Ndege wa Kimataifa wa mzee Mchonga. Acha tumtoe mkuku ili kwenda kumripoti TAKUKURU akanyang’anywe mimali aliyotuibia!

Chanzo: Tanzania Daima Jumatano leo.