Mlevi kuishatiki escrew The Hague

          Baada ya Mlevi na Walevi wenzake kungoja kwa muda mrefu bila majibu, sasa napanga kufungua kesi kwenye Mahakama ya Kimataifa ya Makosa ya Jinai (ICC). Hii ni baada ya kuhadaika kuwa rais Dk Joni Kanywaji angeifungia makufuli escrew kwa kuhakikisha wote walioshiriki ujambazi huu wanaishia lupango. Kwa vile –inavyoonyesha –rahis hana mpango wowote wa kuwasulubu majambazi wa escrew, basi si vibaya kusonga mbele.

            Kwa vile ujambazi wa escrew ni kosa la jinai tena linalosababisha mauaji ya halaiki na ukatili dhidi ya binadamu kwa kueneza umaskini, nina hakika bi mkubwa Bensouda atanielewa na kukubali kutuma wachunguzi kuja kwenye kaya kuchuguza ujambazi wa escrew.

            Baada ya kusikia majambazi fulani wakitishia hata waishiwa wa Mjengoni wasijadili escrow, machale yamenicheza na kuamua kusonga mbele ili kieleweke. Hakuna siku nilikatia tamaa escrow kama siku nilipousikia uteuzi wa mawaziri ambapo jamaa yangu daktari Muongo naye alikuwamo. Baada ya rahis kumvuta mtuhumiwa mwingine A Liar Maswiswi na kumuweka kwenye idara ya njuluku, ndiyo imani yangu iliyeyuka kabisa.

            Kwa vile mimi ni gwiji la sheria, sitahitaji mawakili kunikamua uchache na kufaidi pipa kwenda kushangaashangaa The Hague kule kwa mfalme Leopold aliyewatesa Wakongomani kwa miaka mingi kabla ya kumuua waziri wao mkuu wa kwanza marehemu Patrice Lumumba ambaye alikuwa mwanafunzi wangu katika somo la Political Science nililomfundisha Chuo kikuu.

            Lazima nieleze wazi sababu za kuamua kufungua kesi The Hague. Zipo sababu nyingi tu mojawapo zikiwa:

            Mosi, kutoridhika na mwenendo wa escrew hapa kayani ambako yanatumbuliwa majipu huku mabusha kama escrew yakiachiwa yazidi kutuna na kujaza usaha.

            Pili, baada ya kugundua kamchezo ka kulindana na kugeuzna mabunga hasa uteuzi niliotaja wa jamaa yangu Muongo, ni wazi kuwa tunaoshinikiza escrew itumbuliwe tunaonekana waduwanzi wa kawaida.

            Tatu, tokana na escrew kuhusisha vigogo wengi waliowatumia matapeli kama vile Jimmy Rugemalayer na Singasinga, lazima watakuwa na namna ya kumtisha Dk Kanywaji ima kwa kutumia nguvu za kiama au mitandao yao iliyojaa kwenye lisirikali. Hivyo, uwezekano wa Dk. Kanywaji kugwaya uko wazi.

            Nne, nataka kuweka historia ambayo kisheria huitwa precedent ambayo itasaidia wenginei kufungua kesi ICC ili kushughulikia ujambazi mwingine kama vile EPA, Kagoda, Buzwagi, Richmonduli, UdA, NBC, Kiwila na mwingine mwingi ambao Njaa Kaya aliufutika chini ya busati kana kwamba haupo.

            Katika kesi nitakayofungua, nitaomba watuhumiwa wote watangazwe kuwa gendaeka hatari wasiopaswa kukaribia ofisi za umma.

            Pili, nitaomba mahakama itengue uteuzi wowote uliokwishafanyika unaowahusisha watuhumia.

            Tatu, nitaomba mahakama iwakamate watuhumiwa na kuwaweka ndani bila dhamana hadi uchunguzi ukamilike.

            Nne, nitaomba mahakama ibatilishe uteuzi au uchaguzi wa watuhumiwa si kwenye ofisi za umma tu bali hata kwenye asasi za umma kama vile Mjengoni na kwenye Bodi nyingine za ulaji walimotamalaki watuhumiwa wa escrew, EPA, Richmonduli na madudu mengine.

            Tano, nitaiomba ICC ikamate mali za watuhumiwa zote na kuzirejesha kwa walevi ili waamue cha kuzifanyia.

            Sita, nitaiomba ICC ibatilishe mikataba yote iliyokwisha kuingiwa baina ya makampuni yenye usuhuba na uhusiano na escrew.

            Saba, nitaomba ICC itangaze wazi kuwa watuhumiwa wa escrow na makampuni yao yote yazuiwe kufanya biashara au shughuli yoyote Danganyika maisha.

            Nane, nitaomba ICC iamuru wahusika kulipa fidia kwa muda wote waliokuwa wakiiba na kufanya biashara mbuzi kayani ili liwe fundisho kwa majizi mengine yanayopanga kutuibia.

            Tisa, nitaomba ICC iwakamate pia wale wote walioshirikiana na, kupokea mshiko toka kwa watuhumiwa au kuwalinda kwa namna moja au nyingine. 

            Kumi, nitaomba mataifa yaliyosaidia wezi wa escrew kufanikisha dili lao nao waunganishwe kwenye kesi ya msingi na kutendewa kisheria sawa na watuhumiwa wenyewe. Hapa nitaongeza na viongozi wa kaya waliowahi kushiriki ujambazi huu kwa njia moja au nyingine bila kusahau mawaziri wao waliowezesha mikataba ya kijambazi kama wa escrew kufungwa wakati wakijua walichofanya ni mauaji ya halaiki ya walevi.

            Kumi na moja, nitaomba ICC iitangaze escrew na makampuni yake mama na tanzu kuwa asasi za kigaidi zisizopaswa kufanya biashara au kutoa huduma popote duniani mwezini na kwenye sayari nyingine.

            Kumi na mbili, nitaomba ICC itoe adhabu ya kifo kwa watuhumiwa wote bila kujali ukubwa wa ushiriki wao ili liwe somo kwa gendaeka na majambazi wengine wanaopanga kutuingiza mkenge wakisaidiana na vigogo tuliowaamini ofisi zetu.

            Baada ya kujiridhisha kuwa ninatenda haki, nitaiomba mahakama iamuru wahusika wauawe kwa kuchinjwa na ikiwezekana watafute wataalamu wa kufanya hivyo kutoka ISIL, lile kundi la kigaidi linalosifika kwa ubaradhuli wake wa kuchinja watu wasio na hatia wakati kuna gendaeka kibao kama hawa wa escrow na ujambazi mwingine.

Kumbe sijavuta! Ngoja nikapate msokoto na kumalizia hii chupa ya gongo.

Chanzo: Nipashe 31, 2016.