Kweli Tanzania taifa la matapeli na waganga njaa!

Watu wawili ambao ni Masaganya Kalimanzila mwenye umri wa miaka 30 (mwanamke) na Chiza Juma mwenye umri wa miaka 20 (mwanaume) ambao walitambulika kuwa ni wachawi mara baada ya kubanwa na kujitambulisha,walikamatwa jana majira ya saa 12 asubuhi katika kanisa la Ufunuo lililopo maeneo ya Butimba jijini Mwanza wakisafiri kwa ungo toka kijiji cha Kaziramkunda wilayani Kasulu mkoani Kigoma hadi jijini Mwanza kwania ya kuwachukuwa watu watatu walioagizwa kwaajili ya sadaka.


Ingawa ni mapema kusema, ukweli ni kwamba hiki kinachoitwa kukamata wachawi ni utapeli wa wenye kijikanisa husika ili kionekane kina nguvu za ajabu. Kesho utawasikia matapeli walioko nyuma ya kijikanisa hicho wakihubiri kutenda miujiza na kuwaibia watu maskini na wajinga. Kwanini viongozi wetu wa juu wanafumbia macho jinai hii ambayo sasa inaanza kuzoeleka? Hakuna kitu kama kuruka na ungo wala kukamata wachawi bali utapeli wa kuweka watu wajinga kwenye mazingira ya kuonyesha kuwa walikuwa wachawi wakakamatwa kwa nguvu za mchungaji au nabii wakati ni utapeli. Hawa ndio wanaoua mazeruzeru usiku na mchana wakahubiri kukamata wachawi wakati wachawi wakubwa ni wao. Njaa na ujinga vikichanganyika ni balaa. Ni bahati mbaya kuwa taifa letu limegeuka la utapeli, udaku na uganga njaa. Huu ni uchakachuaji wa kiakili so to speak.